DUROG NA PUSO
(tulang pag-ibig)
Anong ganda pala nitong kalangitan
Mula sa pagsilip ng kaliwanagan
Nagkislapang dyamante, ‘pag kagat ng dilim
Binabalot ang langit nitong mga bituin
Anong ganda pala, ‘pag nagwakas ang ulan
Pag nahawi ang ulap, mula sa karimlan
Nakangiti sa langit ang isang bahaghari
Binunot ang tinik, sa puso kong sawi
Kay ganda rin pala, ng kapaligiran
Sa halik ng liwanag, sila’y nagsasayawan
Mga dagat, mga puno at mga bulaklak
Lumuhang damdamin, ngayon ay nagagalak
May musika pala, sa huni ng mga ibon,
Sa langitngit ng kawayan at pagaspas ng alon
Sumasabay sa pagtibok nitong aking puso
Sa kanilang mga himig, pasakit ay naglaho
Nadurog ang puso, sa nakaraang pagsuyo
Di na napansin ang kagandahan ng mundo
Ngunit ngayo’y may musika at kulay ang paligid
Magmula ng ikaw, ay aking inibig
HAKBANG
(tula ng pag-asa)
Sa panahong ang ‘yong araw
Ay magtatago sa ulap
Sa oras ng kadiliman
Ligaya’y di mahagilap
Kung ang mata’y nabubulag
Di makita ang daanan
Kung ang kalsada’y maputik
At wala kang malakaran
Luluha ang iyong mata
Malulungkot, magdurusa
Madudurog ang ‘yong puso
Sa yakap ng panibugho
Ang mahigpit mong paghawak,
Mga kamay, bumibitak
Mahuhulog sa kawalan
Lahat ay mabibitiwan
Takot ay ‘yong kalimutan
Luha mo ay papahiran
Ika’y aking sasaluhin
Hahanguin ka sa dilim
Hawakan mo’ng aking kamay
Lalaban tayo ng sabay
Tatalikdan ang pagsuko
Sabay hakbang papalayo
ALAY
(tula ng pananampalataya)
Humayo! magdiwang!
Ikalugod ang kaloob Niyang buhay
Magpasalamat! Manalig!
Damhin ang angkin nitong kulay
Sa gitna ng kadiliman
Liwanag Niya ay pinaghari
Sa malungkot na langit
Nilikha Niya ang bahaghari
Sa tahimik na paligid
May awit ang mga ibon
May ihip ng amihan
Na ginhawa ang layon
May araw, may ulan
May hamog at bulaklak
Lahat ng ginhawa
Sa iyo’y Kanyang pinalasap
Luha mo’y papahirin
Mga hiling mo’y ipagkakaloob
Sa taimtim mong panalangin
Siya sayo’y malulugod
Pinakamahalaga niyang handog
Ay ang iyong buhay
At kung paano mo ito gamitin,
Ito sa Kanya, ang iyong alay
ito ay lahok sa Saranggola Blog Awards 8
 |
Walang komento:
Mag-post ng isang Komento